व्यवसाय प्रवर्द्धन केन्द्र, कास्की, पोखरा
केन्द्रका कार्यक्षेत्र तथा सेवाहरू
५.१ उद्यमशीलता डेस्क
उद्यमशीलता डेस्क व्यवसाय प्रवर्द्धन केन्द्रको प्रमुख सेवा इकाइ हो, जसले उद्यम स्थापना गर्न इच्छुक युवा, महिला, विद्यार्थी, वैदेशिक रोजगारीबाट फर्किएका व्यक्ति तथा सम्भावित उद्यमीहरूलाई व्यवसायिक सम्भावनाको पहिचान, व्यवसाय योजना निर्माण, उद्यम सञ्चालनसम्बन्धी परामर्श, क्षमता विकास, वित्तीय साक्षरता, व्यावसायिक कोचिङ, मेन्टरिङ तथा उद्यमको तीव्र विकास र विस्तारका लागि आवश्यक सहयोग उपलब्ध गराउँछ। प्रारम्भिक व्यावसायिक अवधारणादेखि उद्यमको विकास, विस्तार र बजारमा स्थापित हुने चरणसम्म निरन्तर मार्गदर्शन, विशेषज्ञ परामर्श तथा प्रवर्द्धनात्मक सहयोग प्रदान गर्नु यस डेस्कको प्रमुख कार्य हो। यस डेस्कले नवीन सोचलाई सफल उद्यममा रूपान्तरण गर्न आवश्यक ज्ञान, सीप र मार्गदर्शन प्रदान गर्दै स्थानीय स्तरमा उद्यमशील संस्कृतिको विकास, स्वरोजगारका अवसर सिर्जना तथा दिगो आर्थिक विकासमा महत्वपूर्ण योगदान पुर्याउने उद्देश्य राखेको छ। हरित रोजगारी तथा उद्यमशीलता इकोसिस्टम कार्य गर्नेछ।
५.२ व्यवसाय प्रवर्द्धन डेस्क
व्यवसाय प्रवर्द्धन डेस्कले सञ्चालनमा रहेका लघु, घरेलु तथा साना उद्यमहरूको उत्पादन, उत्पादकत्व, गुणस्तर वृद्धि तथा प्रतिस्पर्धात्मक क्षमता अभिवृद्धि गर्न आवश्यक प्राविधिक तथा व्यवसायिक सहजीकरण प्रदान गर्दछ। यस डेस्कमार्फत स्थानीय उत्पादनको ब्रान्डिङ, प्याकेजिङ, बजार व्यवस्थापन, डिजिटल प्रवर्द्धन, प्रदर्शनी, व्यापार मेला, बजार पहुँच विस्तार तथा निजी क्षेत्रसँग व्यावसायिक सम्बन्ध विकास गर्ने कार्य गरिन्छ, जसबाट स्थानीय उत्पादनलाई राष्ट्रिय तथा अन्तर्राष्ट्रिय बजारसम्म पुर्याई उद्यमको दिगो विकासमा टेवा पुर्याइन्छ।
५.३ नवप्रवर्तन डेस्क
नवप्रवर्तन डेस्कले नवीन सोच, अनुसन्धान, प्रविधि तथा सिर्जनशीलतालाई उद्यम र व्यवसायसँग जोड्ने कार्य गर्दछ। यस डेस्कले विद्यार्थी, अनुसन्धानकर्ता, स्टार्टअप समूह तथा नवप्रवर्तकहरूलाई आइडिया विकास, नवप्रवर्तन प्रतियोगिता, ह्याकाथान, प्रोटोटाइप निर्माण, अनुसन्धान सहजीकरण, प्रविधि विकास तथा विश्वविद्यालय, अनुसन्धान संस्था र निजी क्षेत्रसँग समन्वय गरी नवीन अवधारणालाई व्यवसायीकरण गर्ने वातावरण तयार गर्दछ। यसबाट प्रविधिमा आधारित उद्यम विकास, अनुसन्धानको व्यावसायीकरण तथा नवप्रवर्तनमैत्री उद्यमशील पारिस्थितिकी प्रणाली निर्माणमा सहयोग पुग्दछ।
५.४ रोजगार सेवा
रोजगार सेवाले स्थानीय श्रम बजारलाई व्यवस्थित बनाउँदै सीपयुक्त जनशक्ति र रोजगारदाताबीच समन्वय स्थापित गर्ने कार्य गर्दछ। यस अन्तर्गत रोजगार सूचना प्रवाह, रोजगार मेला, करियर परामर्श, रोजगारदातासँग सहकार्य, सीप तथा रोजगारको मिलान (Job Matching) र डिजिटल रोजगार सेवामार्फत रोजगारका अवसर विस्तार गरिन्छ। साथै, तालिम प्राप्त व्यक्तिहरूलाई उपयुक्त रोजगारी वा स्वरोजगारतर्फ उन्मुख गराई बेरोजगारी न्यूनीकरण तथा स्थानीय आर्थिक गतिविधि अभिवृद्धिमा योगदान पुर्याइन्छ।
५.५ परामर्श सेवा
परामर्श सेवाले व्यवसाय स्थापना, सञ्चालन तथा विस्तारका विभिन्न चरणमा उद्यमीहरूलाई आवश्यक प्राविधिक, व्यवस्थापकीय, कानुनी तथा वित्तीय मार्गदर्शन प्रदान गर्दछ। यस सेवामार्फत व्यवसाय दर्ता प्रक्रिया, व्यवसाय योजना निर्माण, कर तथा लेखा व्यवस्थापन, बजार रणनीति, जोखिम व्यवस्थापन तथा व्यवसाय सुधारसम्बन्धी परामर्श उपलब्ध गराइन्छ, जसले उद्यमीहरूलाई तथ्यमा आधारित निर्णय लिन तथा व्यवसायलाई व्यवस्थित र दिगो रूपमा सञ्चालन गर्न सहयोग पुर्याउँछ।
५.६ अनुसन्धान
अनुसन्धान व्यवसाय प्रवर्द्धन केन्द्रको नीति निर्माण तथा कार्यक्रम विकासको आधारभूत कार्यक्षेत्र हो। केन्द्रले स्थानीय स्रोत, व्यवसायिक सम्भावना, बजार अवस्था, उद्यमशीलता, रोजगार, उत्पादन तथा आर्थिक गतिविधिसम्बन्धी अध्ययन, सर्वेक्षण, तथ्याङ्क सङ्कलन, विश्लेषण तथा प्रभाव मूल्याङ्कन गरी प्रमाणमा आधारित नीति तथा कार्यक्रम निर्माणमा सहयोग गर्दछ। यसका साथै अनुसन्धानबाट प्राप्त निष्कर्षका आधारमा स्थानीय आर्थिक विकासलाई प्रभावकारी र दिगो बनाउने रणनीति तयार गरिन्छ। सार्वजनिक निजी संवाद, Policy Lab, पाठशाला, उद्यम क्लिनिक जस्ता कार्य गर्ने।
५.७ प्रविधि हस्तान्तरण
प्रविधि हस्तान्तरण सेवाले आधुनिक प्रविधि, नवीन उत्पादन प्रणाली तथा व्यवस्थापन अभ्यासलाई स्थानीय उद्यमसँग जोड्ने कार्य गर्दछ। केन्द्रले विभिन्न प्राविधिक संस्था, विश्वविद्यालय, अनुसन्धान केन्द्र तथा निजी क्षेत्रसँग सहकार्य गरी नयाँ प्रविधिको परिचय, प्राविधिक तालिम, उत्पादन प्रक्रियाको आधुनिकीकरण, डिजिटल प्रविधिको प्रयोग तथा नवप्रवर्तनमूलक अभ्यासलाई उद्यमीहरूसम्म पुर्याउने कार्य गर्दछ। यसबाट उत्पादनको गुणस्तर, उत्पादकत्व, लागत नियन्त्रण तथा प्रतिस्पर्धात्मक क्षमता अभिवृद्धि गर्न सहयोग पुग्दछ।
५.८ व्यवसाय सहजीकरण
व्यवसाय सहजीकरण सेवाले उद्यमीहरूलाई व्यवसाय स्थापना, सञ्चालन तथा विस्तारका क्रममा आवश्यक पर्ने विभिन्न सरकारी निकाय, वित्तीय संस्था, निजी क्षेत्र तथा विकास साझेदारसँग समन्वय स्थापित गर्न सहयोग गर्दछ। यस अन्तर्गत व्यवसाय दर्ता, इजाजतपत्र, वित्तीय पहुँच, लगानी सहजीकरण, सरकारी सेवा तथा अनुदान कार्यक्रमको जानकारी, बजार पहुँच विस्तार र व्यवसायिक नेटवर्क निर्माणमा आवश्यक सहजीकरण प्रदान गरिन्छ। यस सेवाले उद्यम सञ्चालन प्रक्रियालाई सरल, प्रभावकारी तथा लगानीमैत्री बनाउँदै स्थानीय आर्थिक विकासमा सकारात्मक योगदान पुर्याउँछ।
५.९ स्टार्टअप तथा व्यवसाय वृद्धि
स्टार्टअप तथा व्यवसाय वृद्धि सेवाले नवीन व्यावसायिक अवधारणा, प्रारम्भिक चरणका स्टार्टअप तथा विस्तारको सम्भावना भएका व्यवसायलाई स्थायित्व, वृद्धि र बजार विस्तारतर्फ उन्मुख गराउने कार्य गर्दछ। यस अन्तर्गत व्यवसायिक अवधारणा विकास, व्यवसाय मोडल परिमार्जन, उत्पादन तथा सेवाको परीक्षण, बजार परीक्षण, लगानीको तयारी, लगानीकर्ता तथा व्यावसायिक साझेदारसँग पहुँच, ब्रान्ड विकास, बजार विस्तार तथा व्यवसायको स्केलअपका लागि आवश्यक प्राविधिक, व्यवस्थापकीय तथा व्यावसायिक सहयोग प्रदान गरिन्छ। साथै, प्रारम्भिक चरणका उद्यमलाई आवश्यक कोचिङ, मेन्टरिङ, व्यवसाय वृद्धि तथा तीव्र विकाससम्बन्धी सहयोग उपलब्ध गराई सम्भावनायुक्त व्यवसायलाई दिगो र प्रतिस्पर्धी उद्यमका रूपमा विकास गर्न सहजीकरण गरिन्छ।
५.१० अनुदान तथा सहुलियत कर्जा
अनुदान तथा सहुलियत कर्जा सेवाले उद्यमी तथा व्यवसायीहरूलाई उपलब्ध सार्वजनिक तथा वित्तीय स्रोतमा पहुँच स्थापित गर्न सहजीकरण गर्दै विभिन्न सरकारी तथा संस्थागत अनुदान, सहुलियतपूर्ण कर्जा, ब्याज अनुदान तथा अन्य वित्तीय सहायता सम्बन्धी सूचना, आवेदन प्रक्रिया, आवश्यक कागजात, व्यवसाय योजना निर्माण र वित्तीय संस्थासँगको समन्वयमा सहयोग प्रदान गर्दछ। साथै, महिला, युवा तथा सम्भावनायुक्त उद्यमीको वित्तीय पहुँच विस्तार गरी व्यवसाय स्थापना, सञ्चालन, विस्तार तथा रोजगारी सिर्जनाका लागि आवश्यक पूँजी परिचालनमा सहजीकरण गरिन्छ। यसै अन्तर्गत “उपमेयरसँग महिला” कार्यक्रममार्फत महिला उद्यमी तथा सम्भावित महिला उद्यमीका व्यवसायिक आवश्यकता, चुनौती र सम्भावनाको पहिचान गरी प्रत्यक्ष संवाद, परामर्श, क्षमता विकास, वित्तीय पहुँच तथा व्यवसाय प्रवर्द्धनसम्बन्धी सहजीकरण गरिनेछ।
५.११ दक्ष जनशक्ति उत्पादन तथा सीप परीक्षण
दक्ष जनशक्ति उत्पादन तथा सीप परीक्षण सेवाले स्थानीय श्रम बजारको मागअनुसार आवश्यक सीपयुक्त जनशक्ति उत्पादन, सीप अभिवृद्धि तथा सीपको प्रमाणीकरणमा सहजीकरण गर्दछ। यस अन्तर्गत बजारको माग तथा रोजगारका सम्भावनाका आधारमा विभिन्न व्यावसायिक तथा सीपमूलक तालिम सञ्चालन, तालिमको गुणस्तर तथा प्रभावकारिता अभिवृद्धि, व्यावहारिक अभ्यास, कार्यस्थलमा आधारित सिकाइ तथा रोजगारसँगको समन्वय गरिन्छ। साथै, व्यक्तिको विद्यमान सीपको पहिचान तथा परीक्षण गरी आवश्यकताअनुसार सीप प्रमाणीकरणतर्फ सहजीकरण गरिनेछ। दक्ष जनशक्ति र रोजगार बजारबीच प्रभावकारी सम्बन्ध स्थापित गर्दै सीपयुक्त रोजगारी, स्वरोजगार तथा उद्यमशीलताका अवसर विस्तार गर्नु यस सेवाको प्रमुख उद्देश्य हो।
